--------------------------------------------------------------------------------
طبعا الكل بيتساءل ايه هو حق الخنقة لكل مواطن يا جماعة دا حق جديد من حقوق الانسان ظهر ف المجتمع المصري و امثلته كتير جدا:
1- انت واقف ادام شباك التذاكر ف محطة المترو وبعد ما اخيرا وصلت لاول الصف ييجى واحد واقف ادامك وقاطع التذكرة وهو بيودعك بابتسامة صفراااااااااااا
2-انتا راكب مواصلة او انتى وييجى حد ساند شنطته مهما كان تقلها على رجلك لغاية ما تيجى محطته ويروح نازل بدون حتى ما يكلف نفسه يبص على شكلك وكانه حق طبيعى يعنى
3- ركبت ميكروباص ف عز الحر ونفسك يبطل يحمل بس طبعا هيهات ده الكنبة الاخيرة ما فيهاش غير اربعة والطرقة لسه فاضية
4- ماشى ف الشارع مستعجل جدا واللى ادامك ماشى بمنتهى البطأ والتقل وفجأة يقابل تقريبا اخوه اللى بدلوه ف المستشفى يوم ما اتولدوا وطبعا لازم عشان يسلم عليه يقف ف وسط السكة ويحضنه ويبوسه
5-انتا بتسال ف التليفون عن اجراءات بتعملها ف مصصلحة حكومية وطبعا الموظف المسئول رد وقالك انتا بتسال عن الى عايزه بالتليفون وراح قافل السكة ف وشك طبعا لانك مواطن غير مسئول ومش عارف مصلحتك
6-بنت منقبة ماشية وشاب(من الشباب الامور اللى منتشر اليومين دول)ماشى وراها يقول انا متاكد ان ورا النقاب ده جمال رهيب
7-بعد ما انتصرت على قوى الطبيعة وقوى الشر والقوى العاملة من الشعب وفزت بتذكرة المترو وقبل ما تعدى من الماكينة تيجى واحدة او واحد عايز يعدى معاك بنفس التذكرة وطبعا جزائك الفعص
8-كفاية كدا بقا
السبت نوفمبر 10, 2007 5:52 pm
