دعوه للتدخين .. و فوايد التدخين

اوعى تسمع كلام اللى يقولك بطل الساجير ,ده يبقي واد توتو وما يعرفش فوايد التدخين.
عارف ليه؟؟اقولك انا:
التدخين يضفى عليك مظهر الرجولة:
اذا كنت حاسس انك عيل ومنظرك ما يجيبش راجل ابدا,امسك سيجارة وانفخ فى وش الخلق,حيفتكروك راجل على طول.
التدخين ببطء وتركيز يعطى ايحاء باهميتك وعمق تفكيرك:
اذا كانوا الناس مستهدفين شخصيتك ومنتش مالى عينهم,ولع سيجارة, اسحب كل نفس منها ببطء جدا وانفخه لفوق بعنطزة, الناس حيفتكروا انك عقلية علمية فذة, وخيبقي شكلك ولا لاكى لوك في زمانه.
تدخين السجاير علاج ممتاز لبطء التفكير:
اذا اتزنقت وذكائك مش ساعفك بتصرف سريع ,ولع سيجارة, على ما تولع وتشد وتنفخ, بيكون ربنا فرجها وحتة الدهنة اللى جوة الجمجمة طلعت رد, وماحدش يلحق يحس انك موحوس.
التدخين يجمع البنات الحلوة حواليك:
ويحاوطوا سريرك كمان, ويقعدوا يتغزلوا فيك ويقولوا لبعض: يا سلام لو كل العيانين اللى بيدخلوا لنا قسم الامراض الصدرية شباب حلوين كده.
التدخين يحافظ على صحتك من الامراض المعدية:
طبعا ما الدبان نفسه مش حيهوب ناحيتك وحيقرف من ريحة بقك.
التدخين يحافظ على مظهرك ويحميك من مشاكل الشيخوخة:
ماهو حيموتك بدري قبل ما تلحق تشيب او تصلع.
السيجارة يمكن ان تنقذ مستقبلك:
اسرق الخزنة وارمى السيجارة على الارض قبل ما تخرج, ان الله حليم ستار.
ملحوظة : استعمل سجاير غير اللى انت متعود عليها علشان عقب السيجارة وحكومتك مفتحة يا ريس.
التدخين يجعلك شخصا متميزا:
طبعا ماهو دونا عن خلق الله انت الوحيد اللى بتطلع الغازات.....من بقك.
السيجارة تجعل منك رجلا ذو بصمة لا تمحى من ذاكرة الناس:
اي حتة بتدخلها الناس مش ممكن ينسوا انك شرفتها , وحتى اللى دخلوا بعد خروجك حيعرفوا انك كنت موجود من الريحة الـ.....
السيجارة تكسبك الاحترام:
اول ما تدخل حتة الناس تقوم واقفة على حيلها, ويروحوا جري يفتحوا الشبابيك , وكمان يخدموا عليك ويجبولك الطفاية.
التدخين يضفى عليك سيما الوقار والهدوء:
لو انت بتدخن من زمان وحاولت تمشي بسرعة او تجري وتنط السلم زى العيال, حاتنهج ونفسك يتكرش وحا تبقي حالتك تصعب على الكافر.
السيجارة بتهدى اعصابك لما تكون متغاظ:
هو صحيح في حاجات كتير ممكن تهدى الاعصاب زى الينسون او الكركديه بس شكلك بالسيجارة بيحسس الناس انك فعلا شايط وبتطلع دخان.
السيجارة تساعدك على تجاوز المحن والفرفشة:
دايما في الافلام العربي اول ما البطل ما تحصل له مصيبة يطلع على الكباريه, السيجارة في ايد والكاس في ايد واخر الفيلم يتجوز الرقاصة.
السجائر تقوم سلوكك وتحميك من الانزلاق فى الرذيلة:
ما انت لو بس حاولت تقرب من واحدة حاتقرف من ريحة بقك وتهشك فورا.
التدخين يحسن علاقتك بزوجتك:
انت بتفقد حاسة التذوق تدريجيا فمش هتاخد بالك من طعم العك اللى بتطبخه هى وتوفر على نفسك البهدلة لو اتريقت على طبيخها.
لو كنتى بنت السيجارة بتكتر المعجبين بيكي:
منظر السيجارة في ايد البنت بيوحي انها بنت مودرن ومتحررة وايزي فيتلم الشباب حواليها اللى بيدوروا على بنت ايزي.
السيجارة ممكن تفتحلك باب مكسب كبير:
لو استعملتيها مع مبسم طويل وشوية ماكياج بيلمع حتديلك مظهر المحترفات والبزنس مان يفرق معاه كتير الفرت امبرشين( الانطباع الاول).
-----------------------------------------------------
اتمنى في النهاية انى اشوف كل شاب وكل فتاة على المنتدى بيدخنوا علشان مستقبل افضل ليهم ولينا